Font dubèrta balha d'apleches informatics.

Font dubèrta es una associacion lei 1901, establida a Milhau mas dins lo domeni que nos pertòca lo luòc impòrta gaire. La tòca, justament, es d'espandir l'usatge de l'occitan sus la tela ranha e de balhar al mitan occitanista primièr e als occitans mai largament, d'apleches e de conselhs informatics, porgissèm tanben l'albergament dels sites de Patrimòni, Anèm Òc (nacional) e de mai d'autres. Alara un endrech o un autre, rai, pr'aquò l'estacament sentimental al nòstre trauc demòra .

L'occitan e lo malhum

Las nòvas tecnologias de l'informacion fricotejan dins un topin de ligasons, lo malhum, que liga los ordenadors entre eles, sens far mencion de totes los quicomets electronics del pegaurelha a la nièira espia2. Cap d'òme senat pòt denegar l'abrivada terrible que la revolucion numerica balha a l'umanitat. Nòstra comunautat ganharà fòrça al mostrar que podèm utilizar la tecnologia per se dotar d'apleches qu'abaissan las distàncias, que trason la beutat de la nòstra lenga, la fan partegar al monde entièr, que la nauçan al egal dels autres dins lo ciberespandi. Occitània es tan granda coma lo besonh de se sentir pròche, dempuèi la capitada de Carcassona e mai encara de Besièrs vesèm la fòrça de s'acampar e de se comparar los projèctes, dins quin parlar que siá. Ara la tecnologia permet de se desliurar de la distància.

Los escrichs son bravament servits que se multiplican sus la mendre pagina web, mas encara las cançons e las òbras artisticas dins nos mots espelisson. Mai encara, un còp trobada la pagina, lo blòg o l'article, qu' una autra se mòstra e s'enfiala coma un ribambèl, lo malhum se teis solet, mercé a un o dos tèrmes que s'endevenan plan o a la piquejada capuda dels usancièrs. Cada còp que quauqu'un pica sus un site, l'estadistica monta e amb ela la pertinéncia qu'agrada als motors de cerca. Doncas cada jorn nòstra lenga marca plan de mai en mai. Ara los jornalistas parisencs pòdon picar «occitan» per anar lèu lèu sul portal Wikipedia occitan e se congostar de la riquesa de las contribucions. Per nautres perdèm un pauc mens de temps per lor dire çò qu'es per nos la lenga del bres.

Es pas tot de metre de tèxtes en òc sus la tela, cal que siá un contengut de tria. Venèm de veire qu'un contengut se pòt ligar solet amb d'autres, la magia s'arrèsta pas aquí. Un tèxte pòt èsser encadenat amb d'autres per ne far un recuèlh, una antologia, lo podèm copiar/pegar, ne far de montatges. Los tèxtes vivon sus internet e los interessants, polits, pertinents vivon longtemps e caminan de longa.

 

Font dubèrta e l'òbra de Cantalausa.

Font dubèrta, amb l'aimable autorizacion dels eiretièrs, se tissa de metre lo diccionari de Cantalausa a portat de cadun, un còp que lo contengut es dins la basa de donada, la darrièra version del diccionari es totjorn en linha, los mantenaires pòdon ajustar o adobar los tèrmes a cada moment. Es encara mai facil de traire d'informacions amb de recercas especialisadas que se dison “requèstas”. Per claure amb Cantalausa, un trabalh de Font Dubèrta de las bèls es de donar un autra vida a «Lenga Viva» un recuèlh de frasas que serviguèron a fargar lo diccionari, malastrosament èra sonque un tièira de frasas recampadas jos 28 categorias, siá mai de 11500 frasas e 75 000 mots. Aquela amolonada èra un pauc a l'estrech dins un libre, e de mal utilizar ; ça que la dins una basa de donadas e dins un site internet, vaquí la bona plaça.

Dins l'avant-dire los autors proposan un planpunh d'activitas pedagogicas, l'ordenador el presenta aquò coma un jòc. Dins un avenidor pròche los exercicis seràn porgits per la machina e los regents poiràn trobar un agradable biais de presentar una lenga viva amb las tecnologias modèrnas.

La mesa en linha d'una revista

“Parlem” es una revista auvernhata que se pica son centen numerò valiá lo còp de far quicòm per ela. Lo ueitanta del cent es escanèrizat, sonque los darrièrs numeròs que son en venda i son pas. Lo melhor es que los ensenhadors son dins la basa de donadas e los articles son recampats per rubricas, per dire qu'es possible de far de recercas, legir lo numerò, e mai far una enquèsta sus la produccion literari auvernahata. Fòrt probable una d'aquelas nos permetràn de tirar tròces de ne far un recuèlh amb un pauc de trabalh de reconeissènça de caractèrs.
Morala e adreiça del sit
Me pensi que i a un pauc de mascadura dins las nòvas tecnologias que la resultat es mai bèla que çò qu'esperava l'engenhaire e que lo tot es bravament mai bèl que la soma dels partidas.
Per nos vistalhar : http://macarel.net (d'acordi es una paraulassa, mas m'agrada aital e cambiarai pas).
 

Font Dubèrta
1, charrièra Sent Rames
63000 Clarmont d Auvernha
Telefòn : 09 50 00 19 98
Siti : www.macarel.net
Corriel : d.chateau(arrowbase)laposte(point)net