Un centre de formacion occitan, perqué far ?

A l’ora que d’unes dison critica per la lenga occitana, s’avisam que la demanda d’aprendissatge d’aquesta lenga es a créisser un pauc mai cada jorn. Pauc a cha pauc, de gents - e quitament de sectors d’activitats bèls, coma lo torisme o la santat - prenon conciéncia de la lenga e la cultura que fan l’identitat de la Region Miègjorn-Pirenèus e de sos departaments.

Es fàcia a aquel constat que s’es bastit lo Centre de Formacion Professionala d’Occitània Miègjorn-Pirenèus (CFPO MP), per respondre a una realitat e a una necessitat novèlas. Prepausar una ofèrta de formacion en occitan professionala e de qualitat ; porgir a totis los que lo vòlon aprene una causa « normala », la possibilitat de se formar : aquí la tòca del Centre. Interveneires en occitan dins las classas, ASEM dins d’escòlas bilingas o immersivas, encargat de mission de collectivitats territorialas, ... un fum de mestièrs menan ara a la lenga, e l’ofèrta correspond pas totjorn amb las obligacions de la vida vidanta. Lo CFPO MP met doncas a la disponibilitat de cadun mant’unas alternativas per se formar : estagis intensius (mas convivials !) de qualques jorns ; corses setmanièrs lòng de l’annada escolara ; formacion individualizadas ; formacion de sièis meses...

Dins Avairon, tres estagis PARLAR foguèron ja organizats a Onet-lo-Castèl e a Milhau, qu’aculhiguèron mai de 30 personas vengudas per de rasons professionalas o simplament per enveja. Aital, los animators de l’associacion ADOC 12, que mena una accion de sensibilizacion dins las escòlas del depardouble compétence tament amb lo sostenh financièr del Consèlh General, son estats aculhits tres còps per la còla de formators del CFPO MP. Al program : corses (debutants e avançats), mesas en situacion, improvizacions, talhièrs manuals, ... lo tot dins un banh liguistic complet ! Per menar son activitat de formacion, lo CFPO MP s’apuèja sus sos partenaris de la ret dels Centres de formacion occitan : lo CFPO Lengadòc a Besièrs, en Lengadòc-Rosselhon e lo CFPÒC d’Ortès, en Aquitània, qu’existisson dempuèi mai de temps encara que lo centre miègjorn-pirenenc.

Lo diplòm Escapolaire

Cada annada al mes de julh las tres estructuras organizan una session dins cada Region per passar lo diplòm Escapolaire. Coma son nom l’indica (« escapol », « escapolon », indica quicòm d’entamenat, una debuta), aquel diplòm marca l’aquisicion d’un primièr nivèl en occitan, lo nivèl A2 del Cadre Europeu Comun de Referéncia per las Lengas (CECRL), nommat « nivèl elementari o de subrevida » dins la lenga. L’examen encauta una dobla competéncia en lenga, tant a l’oral coma a l’escrich : l’expression e la compreneson.
Ongan, son mai de 100 personas en tot que l’an presentat en candidats liures, per una capitada de 80% d’entre elas.

La formacion a distància

A l’ora d’ara, lo CFPO Miègjorn-Pirenèus trabalha a una autra formacion, d’un genre novèl : la formacion Escapolaire a la lenga occitana, prepausada dins l’encastre del Programa Regional de Formacion Professionala (PRFP) e en partenariat amb la ret d’ensenhament a distància de la Region, "réseau Pyramide". Formacion de sièis meses dubèrta a un public debutant, son especificitat es d’èsser dispensada « a distància », sens èsser pr’aquò un ensenhament per correspondéncia… Los estagiaris marcats a la formacion se rendon cada setmana sus un dels 14 sits Pyramide presents dins la Region. D’aquí, seguisson lo cors del formator que se tròba, el, sus un autre sit.
Maitas situacions pedagogicas son possiblas : la visioconferéncia, ont los estagiaris de cada sit e lo formator se veson e s’ausisson en dirècte ; la telepresentacion, que tot lo mond s’i s’ausís e se pòt parlar en dirècte mas se vei pas ; lo tutorat, que permet al formator de seguir cadun individualament ; l’auto-formacion ; de moments de regropament que permeton al grop d’apreneires e d’ensenhaires de se retrobar per una jornada amassa.
Al demai dels corses, es previst dins l’encastre de la formacion un estagi d’una setmana qu’a per tòca de far descobrir un mestièr a l’entorn de la lenga o de la cultura occitana.
Dubèrta als salariats e demandaires d’emplecs, la formacion foguèt lançada pel primièr còp en genièr de 2008, amb 20 personas, dont tres sul sit de Milhau. Se tornarà dubrir al mes de genièr que ven, avís als amators !
Per se lançar dins la lenga o afortir sas coneissenças, lo CFPO MP vos balha rendètz-vos cada vacanças escolaras per un estagi PARLAR dins Avairon, e tota l’annada per d’autres eveniments, en occitan segur ! Estagi de Totsant : del 27 al 29 d’octobre de 2008, de 9h a 17h cada jorn, al FJT del Grand Rodés a Onet-le-Château. Estagi dubèrt als començaires, intermediaris e avançats.

CFPO Miègjorn-Pirenèus
05.61.23.99.51
cfpo.mp@gmail.com